Phygital QOFA

26 желтоқсан күні Қарағанды облысында QOFA фиджитал бағыты аясында әлеуметтік мекемелердегі балаларды қолдауға арналған іс-шара өтті. Алдағы Жаңа жыл мерекесіне орай ұйымдастырылған бұл кездесудің басты нәтижесі – балаларға PlayStation 5 ойын консольдерінің табысталуы болды.

Ойын консольдері №4 және №6 мектеп-интернаттарының, «Әсем» және «Таңшолпан» балалар үйлерінің тәрбиеленушілеріне, сондай-ақ ерекше білім беру қажеттіліктері бар балаларға арналған мекемелердің тәрбиеленушілеріне берілді. 

Сыйлықтарды табыстау жылы әрі салтанатты жағдайда өтті. Іс-шараға Қазақстандағы жастар футболын қолдаумен танымал ФК «Шахтёр» командасының капитаны Игорь Шацкий және киберспорт сарапшысы Арман Пирманов қатысты.

Бұл қолдау серіктестердің арқасында жүзеге асты. Бас демеуші ретінде Mastercard компаниясы қолдау көрсетті. Қайырымдылық аукционы аясында арнайы лот – Килиан Мбаппенің жейдесі ұсынылды. Ол Қайрат Боранбаевтың тарапынан 3 миллион теңгеге сатып алынған.

Аукцион барысында жиналған барлық қаражат PlayStation 5 ойын консольдерін сатып алуға және әлеуметтік мекемелердегі балаларды қолдауға бағытталды.

Іс-шараны ұйымдастырушы – Қарағанды облыстық футбол ассоциациясы (QOFA). Сондай-ақ бастаманы UEL Team, QJ League және ФК «Шахтёр» қолдады. Тұрақты серіктес – Dodo Pizza.

Осылайша, Қарағанды облысында классикалық футбол мен киберфутболды біріктіретін фиджитал бағытты жүйелі дамытуға бастау берілді. Жоба балалар мен жасөспірімдердің, оның ішінде әлеуметтік мекемелердің тәрбиеленушілерінің қатысу аясын кеңейтеді.

Алдағы кезеңде жоба аясында киберфутболдан өңірлік жарыстарды ұйымдастыру және кәсіби жаттықтырушылармен жұмыс жүргізу көзделіп отыр. Бұл бастама ұзақ мерзімді дамуға және жаңа таланттарды даярлауға бағытталған.