Оқу Freedom және Қарағанды облысының білім басқармасының қолдауымен өтіп, жаңа оқу жылына дайындықтың бір бөлігіне айналды. Оның басты мақсаты — мұғалімдерге бастауыш сыныптарда футбол сабақтарын қызықты әрі қауіпсіз өткізуге және балалардың дайындық деңгейін ескеріп жұмыс істеуге қажетті құралдар беру.
Теориялық бөлімнің спикерлері — «Шахтёр» ФК Академиясының жетекшісі, UEFA Pro лицензиясының иегері Сергей Якушин және «Шахтёр» ФК Академиясының кіші жас блогының жетекшісі, ALGA! жобасының әдіскері Жәнібек Аллабергенов.
Семинарға барлығы 187 адам қатысты: ALGA! жобасындағы 40 мектептен 147 мұғалім және Freedom BFL-дің 40 жаттықтырушысы.
«Мектеп мұғалімдерінің рөлі өте маңызды. Академияға біз көбіне балаларды 11–12 жастан қабылдаймыз, ал бастапқы дайындық одан ертерек басталады. Ең бастысы — баланы спортқа баулып, футболға қызықтыру. Осыдан кейін ғана техника, командадағы қарым-қатынас және басқа да бағыттармен жұмыс істеуге болады.»
Команданы жаттықтыру емес, әр баланы футболға тарту
Бағдарламаның негізгі бөлігі теорияға арналды. Педагогтер мектептегі футбол сабағында мұғалімнің рөлін, қауіпсіздік пен алғашқы көмекті, техника мен тактиканың негіздерін, балалармен қарым-қатынас жасауды және топпен жұмыс істеуді қарастырды.
Мектептегі футбол сабағының басты мақсаты — ең талантты балаларды іріктеу немесе болашақ кәсіби футболшыларды дайындау емес. Ең маңыздысы — бүкіл сыныпты ойынға қатыстырып, әр баланың дайындығына қарамастан футболдан жақсы әсер алуына жағдай жасау.
Grassroots тәсілі де осы қағидаға негізделген: алдымен қозғалыс пен футболға қызығушылық, содан кейін дағдыларды біртіндеп меңгеру. Педагогтерге балаларды дайындығы жоғары сыныптастарымен салыстырмаудың және жаттығу кезінде қателесуге мүмкіндік берудің маңызы түсіндірілді.
Қауіпсіздікке де көп көңіл бөлінді. Алғашқы көмек көрсету, сабақ кезіндегі тәртіп ережелері және бала қателесуден немесе өзіне қиын екенін айтудан қорықпайтын орта қалыптастыру мәселелері қарастырылды.
Футболды ойын арқылы қалай үйретуге болады?
Теориялық бағдарламаның жеке бөлігі футбол техникасына арналды. Педагогтер допты алып жүру, пас беру және қабылдау, сондай-ақ соққы жасау сияқты үш негізгі элементті қарастырды.
Негізгі қағида — балалар футболды ойын барысында үйренуі керек. Педагогтерге оқушыларды доп алып жүруге, пас беруге және соққы жасауға біртіндеп үйретіп, кейін осы дағдыларды шағын ойындарда бекіту жолдары көрсетілді. Мұндай формат әр баланың доппен жиі жұмыс істеуіне және сабаққа үнемі қатысуына мүмкіндік береді.
Сыныппен жұмыс істеуге де көп көңіл бөлінді. Мұғалімдер тапсырмаларды түсінікті жеткізу, бір нәрсе дұрыс шықпаған кезде баланы қолдау және сабақ барысында туындайтын жағдайларға дұрыс әрекет ету жолдарын талқылады. Сонымен қатар ата-аналармен қарым-қатынас және мектеп тәжірибесінде кездесетін бірнеше жағдай қарастырылды.
Сабақты «нөлден» құрудың орнына — дайын жоспар
Бағдарламаның тағы бір бөлігі Freedom Football Manager (FFM) платформасымен жұмыс істеуге арналды. ALGA! жобасы үшін онда бастауыш сыныптарға бейімделген жаттығулар базасы жасалған.
«Біз әр мұғалімге оның спорттық немесе академиялық тәжірибесіне қарамастан, сабақты өз бетінше жоспарлауға мүмкіндік бергіміз келеді. ALGA! жобасының әдістемелік тобы таңдалған жаттығуларды көріп, педагогтерге тұрақты түрде кері байланыс бере алады.»
Оқу барысында қатысушыларға FFM-мен жұмыс істеудің барлық кезеңі — жүйеге кіру мен топты таңдаудан бастап, жаттығуларды іздеу және дайын сабақ жоспарын құруға дейін көрсетілді.
Теориядан — алаңға
Оқудың екінші бөлігі «Шахтёр» стадионында өтті. Мұнда мұғалімдер мектеп сабақтарында қолдана алатын жаттығуларды өздері орындап көрді.
Практикалық бөлім эстафеталардан басталып, кейін допты алып жүру мен қақпаға соққы жасауға, одан соң пас беруге арналған жаттығулармен жалғасты. Сабақ футбол ойынымен аяқталды, онда қатысушылар үйренген элементтерін ойын жағдайында қолданды.
Практикалық бөлімнен кейін мектептер футбол сабақтарын өткізуге қажетті толық жабдықтар жиынтығын алды. Әр мектепке Даниядан жеткізілген 40 Select добы, 30 конус, 50 фишка, 60 манишка, төрт шағын қақпа, доптарға арналған екі сөмке, бір насос және үш ысқырық берілді. Сонымен қатар мұғалімдер сабақ өткізуге арналған спорттық киіммен қамтамасыз етілді.
ALGA! бүкіл Қарағанды облысына кеңейіп келеді
ALGA! жобасының алғашқы жылы пилоттық форматта өтті. Жоба Қарағанды облысының бес елді мекеніндегі 10 мектепті қамтыды. Футбол сабақтары ресми оқу кестесіне енгізіліп, бастауыш сыныптардағы дене шынықтыру пәнінің үшінші сабағы футбол негізінде өткізілді. Бірінші жылдың өзінде жобаға 86 сыныптан 1 929 бала қатысты.
Жаңа оқу жылында жобаның ауқымы бірден төрт есе өсті — енді ALGA! бағдарламасына Қарағанды облысының түкпір-түкпірінен 40 мектеп қатысады. Жобаның географиясы да айтарлықтай кеңейді: оған Балқаш, Ақтоғай, Шет ауданы және Шахтинск қаласын қоса алғанда, облыстың әртүрлі қалалары мен аудандарындағы мектептер қосылды.
Жобаның кеңеюімен футбол сабақтарын өткізетін педагогтердің саны да артады. Сондықтан жаңа кезеңдегі міндеттердің бірі — ALGA! жобасына қатысатын барлық мектепте сабақ өткізудің бірыңғай тәсілін қалыптастыру. Оқу барысында алған білімдерін, дайын сабақ жоспарлары мен спорттық жабдықтарды мұғалімдер жаңа оқу жылының басынан бастап пайдалана алады.
