Бұл жолы заманауи приставкалар «Ерекше білім беру қажеттіліктері бар балаларды қолдау орталығына» берілді. Орталықта ойын құрылғылары болғанымен, олар ескірген. Сондықтан QOFA балалардың бос уақытын қызықты әрі заманауи форматта өткізуіне жағдай жасау үшін жаңа Sony PlayStation 5 құрылғыларын табыстады.
Орталық директоры Данекер Сейсекина мұндай бастамалардың балалар үшін аса маңызды екенін айтты:
«Біздің орталықта ерекше балалар тәрбиеленеді. Phygital форматындағы ойындарға қатысу олардың дамуына үлкен серпін береді. Жарыстарға қатысу барысында балалардың бойынан оң өзгерістер байқалды: олар ашыла түсті. Әсіресе, жарыс рухы мен жеңіске деген ұмтылыс олардың өз күшіне сенуіне көмектеседі. Бұл өзгерістер ойын кезінде ғана емес, күнделікті мінез-құлқынан да байқалады. Балалар бір-біріне қолдау көрсетуді және ортақ мақсатқа бірге ұмтылуды үйренеді».
Бұл жоба аясында PlayStation сыйланған бесінші әлеуметтік мекеме.Осы бағыттағы алғашқы ауқымды қадам ALGA KIDS FEST жобасы аясында қолға алынған болатын. Былтыр желтоқсан айында өткен жоба әлеуметтік мекемелердегі балаларға қолдау көрсетуге бағытталып, жаңа жыл қарсаңында 4 орталыққа PlayStation 5 ойын құрылғылары сыйға тартылды: №4 және №6 мектеп-интернаттары, «Әсем» және «Таңшолпан» балалар үйлері.
Қазір жоба толыққанды даму үстінде. Phygital Киберлигаға ақпан айында ресми түрде басталып, балалар үйлері мен арнайы әлеуметтік мекемелердің тәрбиеленушілері қатысты. Қыс мезгілінде балалар PlayStation арқылы киберфутбол ойнаса, жылы маусымда жасыл алаңда шынайы футбол ойнайды. Осылайша Phygital форматы арқылы спорт мәдениеті мен командалық рухты дамытады.
Қазіргі таңда жоба тұрақты даму үстінде: маусым айында Phygital Киберлигасының үлкен гранд-финалы өтеді. Болашақта өңірлік турнирлер ұйымдастырылып, балалар кәсіби жаттықтырушылармен жүйелі түрде жұмыс істеуді жалғастырады.
