QOFA өкілдері Қарағандыдағы жаңа экосаябақты көркейтуге атсалысты
Қарағанды қаласында «Таза Қазақстан» республикалық бағдарламасы аясында ауқымды көгалдандыру акциясы өтті.
Игі бастамаға облыстың барлық қала-аудандарынан келген тұрғындар, еріктілер, қоғамдық ұйымдар мен спорт қауымдастығының өкілдері қатысты.
Шара Қарағанды қаласының қарқынды дамып келе жатқан жаңа ауданында – «Көгілдір тоғандар» шағынауданы мен Оңтүстік-Шығыс арасындағы аумақта ұйымдастырылды. Болашақта мұнда тұрғын үйлер, әлеуметтік нысандар, білім беру мекемелері және ірі спорт кластері орналасады. Сонымен қатар аумағы 200 гектарды құрайтын заманауи экосаябақ қалыптасып жатыр.
Көгалдандыру акциясына Қарағанды облыстық футбол ассоциациясымен (QOFA) мен «Шахтер» футбол клубының ұжымы да белсенді қатысты. QOFA атынан биіктігі 2,5 метр болатын 25 түп терек көшетін отырғызылды. Ал «Шахтер» футбол клубы 10 қарағаш пен 10 терек көшетін екті.
Спорт қоғамды біріктіретін, жауапкершілік пен ортақ құндылықтарды дәріптейтін маңызды құрал. Сондықтан QOFA үшін өңірдегі әлеуметтік және экологиялық бастамаларға қатысу ерекше маңызға ие. Бүгін біздің ұжым ағаш отырғызу арқылы болашақ ұрпаққа арналған игі іске өз үлесін қосты. Бұл экосаябақ алдағы жылдары тұрғындардың сүйікті демалыс орындарының біріне айналады деп сенеміз. Осындай бастамалар қоғамның бірлігін нығайтып, туған жерге деген жанашырлықты арттырады.
QOFA әлеуметтік жобалар бөлімінің басшысы Данияр Кәрібаев
Облыс әкімі Ермағанбет Бөлекпаев акцияға қатысушылармен кездесіп, асар дәстүрінің қоғамдағы маңызына тоқталды.
Асар – адамдардың ортақ іске ешқандай сыйақы күтпестен және жауапкершілікті өзгеге жүктеместен бірігуі. Біз мұндай жобаларды көбіне егілген ағаштардың саны немесе атқарылған жұмыстың көлемі арқылы бағалаймыз. Алайда мұндай акциялардың басты нәтижесі тек цифрлармен өлшенбейді. Ең маңызды нәтиже – біздің ортақ болашағымызға бейжай қарамайтын азаматтар.
Мамыр айының ортасында басталған экосаябақтың алғашқы кезеңінде 2600 ағаш егілсе, бүгінгі сенбілік барысында тағы 2000-нан астам көшет отырғызылды. Осылайша көктемгі көгалдандыру кезеңі аяқталып, енді ағаштарды күтіп-баптау жұмыстары жалғасады. Ал күзде саябақ аумағына қосымша 15 мың ағаш отырғызу жоспарланған.
Болашақ экосаябақ серуен жолақтарымен, велосипед жолдарымен, спорт алаңдарымен және демалыс аймақтарымен жабдықталады. Сонымен қатар бұл аумақта Қарағанды өңіріндегі ең ірі спорттық инфрақұрылымдардың бірі қалыптасады.
Қазіргі таңда мұнда Freedom қолдауымен құны 12 миллиард теңгені құрайтын «Шахтер» футбол академиясының құрылысы жүргізілуде. Жоба аясында 3500 орындық стадион, жыл бойы жаттығуға мүмкіндік беретін жабық манеж, жылытылатын толық өлшемді футбол алаңы, ұлдар мен қыздарға арналған интернат, сондай-ақ жаттығу залдары, бассейн, асхана және медициналық кабинеттері бар әкімшілік-тұрмыстық кешен салынады.
Басқа жаңалықтар
Phygital: ерекше балалар үшін жаңа мүмкіндік
Қарағанды облысында phygital бағытындағы жобалар біртіндеп дамып келеді. Дәстүрлі футбол мен киберфутболды біріктіретін бұл формат бүгінде балалар мен жасөспірімдерге арналған маңызды әлеуметтік әрі спорттық бастамаға айналды.
QOFA Қарағанды студенттеріне BASTA! жобасын таныстырды!
Қарағанды облыстық футбол қауымдастығы (QOFA) Қарағандыдағы жетекші оқу орындарының студенттерімен бірқатар кездесулер өткізіп, спорттық менеджмент саласындағы тағылымдама бағдарламасы — BASTA! жаңа жобасын ұсынды.
QOFA жобалары «Жасыл толқын» эфирінде
«Жаңа FM» радиосындағы «Жасыл толқын» эфирінде QOFA ұйымының әлеуметтік жобалар бөлімінің жетекшісі Данияр Кәрібаев қонақ болды.
Жасымас жігер жеңіске жетелейді
Қарағандыда ерекше футзал командасы бар. «Пантера»– есту қабілеті шектеулі жігіттерден құралған ұжым. Олар үшін футбол – тек ойын емес, өздерін дәлелдеудің бір жолы.
