ALGA! – QOFA-ның мектеп оқушыларына арналған футбол жобасы

ALGA! – балалардың дене тәрбиесін үйлесімді дамытуға, оларды салауатты өмір салтына баулуға, спортпен тұрақты айналысуға ынталандыруға бағытталған QOFA-ның мектептік футбол жобасы.

2025 жылы QOFA ALGA! жобасының пилоттық кезеңін іске қосады. Жоба Қарағанды, Саран, Теміртау, Абай қалаларымен Үштөбе ауылындағы 10 жалпы білім беретін мектепті қамтиды.

2025/2026 оқу жылында жүзеге асырылатын негізгі бағыттар:

• 1–4 сынып оқушылары (ұлдар мен қыздар) үшін дене шынықтыру пәнінің үшінші сабағы футбол сабағы ретінде өткізіледі;
• 5–11 сынып оқушыларына арналған тұрақты футбол секцияларын ашуға қолдау көрсетіледі;
• Мектептерге футбол сабағын өткізуге қажетті заманауи спорттық құрал-жабдықтар (доптар, манишкалар, қақпалар және т.б.) беріледі;
• Дене шынықтыру және бастауыш сынып мұғалімдеріне арналған біліктілікті арттыру семинарлары өткізіледі;
• Жобаға қатысушы мектептер үшін үлкен фестивальдар ұйымдастырылады. Онда кәсіби футболшылар мен жаттықтырушылардан шеберлік сабақтары, түрлі спорттық ойындар, байқаулар, бағалы сыйлықтар және танымал қазақстандық әртістердің қатысуымен концерт өтеді;
• Жоба аясында ерекше көзге түскен үздік мектептер мен мұғалімдер арнайы марапатталады.

2026/2027 оқу жылынан бастап жобаны Қарағанды облысындағы басқа да мектептерге кеңейтіп, қатысушы мектептер арасында жаңа форматтағы футбол жарыстарын ұйымдастыру жоспарлануда.

2029 жылға дейін QOFA ALGA! жобасына қатысатын білім беру ұйымдарының аумағына жасанды жабыны бар кіші форматты (20×40 м) 10 футбол алаңын орнатуды көздеп отыр.

2026/2027 оқу жылына арналған қатысу өтінімдері QOFA-ның ресми электрондық поштасы – info@qofa.kz арқылы қабылданады және Қарағанды облысының Білім басқармасымен бірлесе қаралады.

ALGA! жобасы Қарағанды облысы әкімдігі мен оның құрылымдық бөлімшелерінің қолдауымен жүзеге асады және жоба толықтай бас серіктес – Freedom Holding Corp. есебінен қаржыландырылады.