Freedom Futsal BFL жаңа кезеңі: Қарағандының жас таланттары алаңға шықты

Биыл бәсеке ауқымын кеңейтіп, U-13, U-15, U-17 және U-19 жас санаттарын қамтыды. Бұл – өңірдегі жас спортшылар үшін тұрақты ойын тәжірибесін жинап, шеберлігін шыңдауға берілген маңызды мүмкіндік. Жаңа кезеңге 23 команда қатысып отыр.

Алғашқы турдың өзі жанкүйерлерді бейжай қалдырмады: ойындар жоғары қарқынмен өтіп, алаңда нағыз тартыс өтті. Әсіресе, турнирдің шымылдығын түрген «Nurmaqov» пен «STU-2» арасындағы кездесу ерекше есте қалды. Екі команда да шабуылға басымдық беріп, нәтижесінде матчта 9 гол соғылды. Қорытынды есеп — 4:5. Соңғы сәттерде басым түскен «STU-2» жеңісті жұлып әкетті. Команда капитаны Илья Григорьевтің айтуынша, биыл Әбілқас Сағынов атындағы Қарағанды техникалық университеті бірнеше жас санатына бірдей қатысып отыр.

Турнирдің ұйымдастырушысы Мәди Кәрібай жаңа формат пен алғашқы тур туралы пікір білдірді:

Жаңа жас санаттарының енгізілуі — Қарағанды облысында футзал мен футболды дамыту жолындағы маңызды қадам. Қарағанды облыстық футбол қауымдастығы мен Freedom Holding Corp. қолдауының арқасында жас спортшылар сапалы бәсекеде шыңдалып, үлкен спортқа нық қадам жасауға мүмкіндік алып отыр. 

Ойындар әр демалыс сайын екі заманауи алаңда өтеді: «Аманат» спорт кешені (Қарбышева көшесі, 7/5) және «Amanat Arena» (Ермеков көшесі, 49/3). Мұндай жобалар жас спортшылардың әлеуетін ашып қана қоймай, болашақта кәсіби спортқа жол салуға негіз болады.Сондықтан жанкүйерлерді жас таланттарға қолдау көрсетуге шақырамыз.