Саран қаласында Қарағанды облысының футболдан біріншілігі өз мәресіне жетті

Бірнеше ай бойы Саран қаласында өткен Қарағанды облысының футболдан біріншілігі биылғы жылдың ең ауқымды спорттық оқиғаларының біріне айналды. Жарысқа 2011–2012, 2013–2014 және 2015–2016 жылдары туған үш жас санатындағы 50 команда қатысты.

Жарыс барысында жас футболшылар жоғары дайындық деңгейін көрсетті. Әртүрлі дивизиондарда жеңімпаз және жүлдегер атанғандар қатарында «Шахтёр», «Скаут», «СДЮШОР», «Металлург», «Барс» және басқа да командалардың тәрбиеленушілері. Медальдар мен кубоктардан бөлек, әр жас санатындағы ең үздік қақпашылар, қорғаушылар, жартылай қорғаушылар мен шабуылшылар марапаттарға ие болды.

Ұйымдастырушылар ойындарды әділ және тартысты өткізуге үлес қосқан төрешілердің еңбегін ерекше атап өтті.

Қарағанды облыстық футбол ассоциациясының басқарушы директоры Николай Бублинский маусымның аяқталуымен спортшыларды құттықтап, оларға табыс тіледі

Саран қаласындағы біріншілік нағыз футбол мерекесіне айналып, өңірдегі балалар мен жасөспірімдер спортының қарқынды дамып келе жатқанын дәлелдеді. Бұл турнир жаңа буын ойыншыларын үлкен жеңістерге шабыттандырды.