Артем Кучин: «Футболшыларды ойын ережелеріне үйрету арқылы біз оларды тәртіпке шақырамыз»

Спикер ретінде Артем Кучин сөз алды. Ол – тәжірибелі маман, он бес жылдан астам уақыт бойы республикалық және халықаралық деңгейдегі көптеген матчтарда төрелік еткен. Оның тәжірибесінде 2014 жылғы Әлем чемпионатының іріктеу ойындары, УЕФА Еуропа лигасы мен Конференциялар лигасы, Қазақстан Кубогы мен Суперкубогының финалдары, Еуропа чемпионаттарының U17 және U19 жас ерекшелік топтарының ақтық додалары, сондай-ақ УЕФА Аймақтар кубогының финалы бар.

Артем Кучин семинардың қалай өткенін айтып, ойыншылар үшін ережелерді егжей-тегжей білу неге маңызды екенін түсіндірді.

Бұл семинарға негізінен жасөспірімдер қатысты. Оның ішінде СДЮСШОР-дың аға тобының ойыншылары, сондай-ақ облыс біріншілігіне қатысатын «Тау» спорт клубының футболшылары болды.

Мен оларға төрешіліктің не екенін біртіндеп түсіндіріп, біздің ортаға тартуға тырыстым. Өзімнің төрешілікке қалай келгенімді әңгімеледім. Бұған дейін мен де ойыншы болғанымды, футболдағы өмірімді жалғастырғым келіп төреші болуды таңдағанымды айттым – және бұл шешімге ешқашан өкінбегенімді жеткіздім. Сонымен қатар халықаралық мансабым туралы, Қазақстан Премьер-лигасындағы тәжірибем жайлы аздап бөлістім. Балалар сұрақ қойды: қандай қиын немесе қызықты матчтар болды деген сияқты. Осы арқылы оларды төрешілердің қызықты да күрделі өміріне тартқым келді.

Бұл семинар, менің ойымша, жастарды төрешілер комитетіне, жас арбитрлер мектебіне қызықтыруға және болашақта Премьер-лига төрешісі болуға жол ашуы мүмкін. Тіпті араларынан біреуі халықаралық деңгейге дейін жетуі ғажап емес – әрине, егер бізге келіп, осы жолды таңдаса.

Ұсынылған материал кіріспе сипатта болды. Барлық футболшылар ережелерді білеміз деп ойлайды, бірақ іс жүзінде олай емес. Біз үшін қарапайым болып көрінетін жайттарды түсіндіргенде, олардың көпшілігі үшін бұл жаңалық болып шығады. Сондықтан қызықты болды деп ойлаймын.

Футболшыларды ойын ережелеріне үйрету арқылы біз оларды белгілі бір деңгейде тәртіпке баулимыз. Олар төрешінің неге белгілі бір шешім қабылдағанын түсіне бастайды. Әрине, бұны толыққанды білу үшін кеңейтілген форматтағы семинар қажет. Ал оны өмірдің өзі көрсетеді – олар алған білімді қолдана ма, жоқ па.