XXV қалалық «Жаңа буын» футбол турнирі өз мәресіне жетті

Ширек ғасырлық тарихы бар дәстүрлі турнирдің басты мақсаты – жасөспірімдер арасында салауатты өмір салтын насихаттау, балаларды спортқа баулу және командалық рухты қалыптастыру.  Турнирдің бас төрешісі Бағылан Қонақбаев жарыстың маңызына тоқталып, бұл дода тек спорттық бәсеке ғана емес, Шаймерден Оразалиновтың есімін ұлықтайтын маңызды алаң екенін атап өтті.

Ал жарысқа қатысушы жас футболшы Матвей Таку турнирдің өзі үшін ерекше маңызға ие екенін айтты.

Турнирдің жабылу салтанатына 1972 жылғы Мюнхен Олимпиадасының қатысушысы, КСРО велоспорт құрамасының капитаны А.Г. Степаненко, турнирдің негізін қалаушылардың бірі В.Л. Громов, Қарағанды облыстық футбол қауымдастығының басқарушы директоры Н.С. Бублинский, мәдениет, тілдерді дамыту, дене шынықтыру және спорт бөлімінің спорт секторының меңгерушісі Б.М. Досымбеков қатысты.

Қарағанды облыстық футбол ассоциациясы турнирдің дәстүрлі ұйымдастырушыларының бірі болды.

Бір аптаға созылған тартысты ойындардың қорытындысы бойынша Ыбырай Алтынсарин атындағы лицей чемпион атанды. №97 гимназия күміс жүлдеге ие болса, №19 жалпы білім беретін мектеп қола медаль жеңіп алды.

Турнир қорытындысы:

1-орын – Ы. Алтынсарин атындағы лицей

2-орын – №97 гимназия

3-орын – №19 жалпы білім беретін мектеп

Жеңімпаз командалар кубок, медаль, дипломдар және бағалы сыйлықтармен марапатталды.

Айта кетейік, Шаймерден Оразалинов – Қарағанды қаласының әкімі қызметін атқарған, Қазақстан Республикасы Парламенті Мәжілісінің ІІ және ІІІ шақырылымдарының депутаты болған көрнекті мемлекет және қоғам қайраткері. Ол өңірде спорт саласының дамуына ерекше үлес қосып, жастар футболының дамуына қолдау білдірген тұлға ретінде ел жадында сақталған.