Төрешілер корпусының дамуы

Террикон алқабында Жас төрешілер мектебінің жұмысы жалғасуда. Бағдарлама екі бағытты қамтып, жас төрешілердің теориялық білімін жетілдіруге және ойын сәттерін жан-жақты талдауға мүмкіндік береді.

Үлкен футбол төрешілері үшін қыс мезгілі – жазғы маусымға белсенді дайындық кезеңі болса, футзал төрешілері үшін жұмыс әдеттегі ойын ырғағында жалғасуда. Форматына қарамастан, оқу үдерісі төрешілік сапасын арттыруға және алдағы кезеңнің жүктемесіне дайын болуға бағытталған.

Қазақстан футбол Федерациясының инспекторы, Төрешілер комитетінің нұсқаушысы Артем Кучиннің жетекшілігімен төрешілер жаз мезгілінде өтетін футбол матчтарына қазірден бастап дайындалуда. Мұндай тәсіл жарыстар басталғанға дейін мықты теориялық әрі психологиялық негіз қалыптастыруға мүмкіндік береді.

Футбол бағыты бойынша дайындық барысында оқыту тесттері өткізіліп, ресми матчтарда кездесетін ойын жағдайлары талданды. Бұл формат ережелерді тексеріп қана қоймай, ойынның жоғары қарқынында жылдам әрі дұрыс шешім қабылдау қабілетін дамытуға көмектеседі.

Футзал бойынша оқу өткен тур матчтарының бейнежазбаларын жан-жақты талдауға негізделді. Қатысушылар негізгі ойын оқиғаларын саралап, даулы сәттерді, қабылданған шешімдердің дұрыстығын және төрешілер бригадасының әрекеттерін талқылады. Ашық пікір алмасу форматы әр қатысушыға өз ойын білдіруге мүмкіндік беріп, Қазақстан футзал чемпионатының төрешісі Изат Мусилимовтен кәсіби кері байланыс алуға жол ашты.

Футбол мен футзал арасындағы айырмашылықтарға қарамастан, төрешілерді даярлау тәсілі ортақ қағидаттарға негізделген. Екі бағытта да ережені терең түсіну, шешім қабылдау, қысым жағдайында жұмыс істеу және матч қатысушыларымен өзара әрекетке ерекше назар аударылады.

QOFA Жас төрешілер мектебі арбитр корпусын даярлау бойынша жүйелі жұмысты жалғастырып, жас мамандардың кәсіби дамуына және әртүрлі форматтағы жарыстарға сенімді шығуына жағдай жасауда.