QOFA Серік Сәрсембайұлы Бердалиннің қазасына байланысты көңіл айтады

Қарағанды облыстық футбол ассоциациясы Серік Сәрсембайұлы Бердалиннің өмірден өтуіне байланысты оның отбасы мен жақындарына орны толмас қазаға орай шын жүректен көңіл айтады.

Серік Сәрсембайұлы – өмірін футболға арнаған, қазақ спортында өзіндік із қалдырған ерекше тұлға. Ол талай жыл бойы жас буынға тек футболдың техникасы мен тактикасын үйретіп қана қоймай, адамгершіліктің, табандылықтың, адал еңбектің және спортқа деген сүйіспеншіліктің үлгісін көрсетті. Оның тәлімін көрген әрбір спортшы өмір бойы ұмытпайтын мектептен өтті.

Футболдағы жолын «Шахтёр» клубының тәрбиеленушісі ретінде бастаған ол кейін команданың бас бапкері, клуб президенті, ұлттық құраманың жаттықтырушысы қызметтерін атқарды. Осы жылдар ішінде Серік Сәрсембайұлы Қазақстан футболының дамуына өлшеусіз үлес қосып, көптеген дарынды ойыншылардың қалыптасуына себепкер болды. Оның еңбегі еленіп, Қазақстан Республикасының еңбек сіңірген бапкері және еңбек сіңірген спортшысы атақтарына ие болды. 1995 жылы «Қазақстанның үздік бапкері» номинациясының иегері атанды.

Серік Сәрсембайұлының өз ісіне деген адалдығы, шәкірттеріне жасаған қамқорлығы мен спортқа деген шексіз махаббаты әрдайым ел есінде қалады. Ол тек мықты маман ғана емес, нағыз ұстаз, адамдықтың үлгісі, үлкен жүректі жан еді.

Қазақ футболы біртуар тұлғасынан айырылды. Оның жарқын бейнесі, еңбегі мен тәрбие жолы біздің жүрегімізде мәңгі сақталады.