Қарағандыда «Шахтёр» футбол академиясының құрылысы қызу жүріп жатыр

Қарағанды облысында заманауи «Шахтёр» футбол академиясының құрылысы белсенді түрде жүргізілуде. Жаңа спорт кешені өңірде салынатын ірі спорт кластерінің бір бөлігіне айналып, балалар мен жасөспірімдер футболын және кәсіби деңгейдегі спортшыларды даярлауға толық жағдай жасайды.

Жобаның жалпы аумағы шамамен 10 гектарды қамтиды. Мұнда UEFA талаптарына сай 4-ші санаттағы 3500 орындық стадион, жыл бойы жаттығуға арналған жабық манеж, толық өлшемді жаттығу алаңы және екі қабатты әкімшілік-тұрмыстық ғимарат бой көтереді.

Кешен ішінде медициналық бөлмелер, асхана, бассейн, сауна және жатақхана қарастырылған. Барлық нысандар жылы өткелдер арқылы байланыстырылып, айналасына воркаут аймағы, жаттығу құрылғылары, саябақ және автотұрақтар салынбақ.

Құрылыс барысын Қарағанды облысының дене шынықтыру және спорт басқармасының басшысы, Олимпиада чемпионы Серік Сәпиев өзі барып көрді. Ол жобаның өңір спорты үшін стратегиялық маңызға ие екенін атап өтіп, инвесторға спортты дамытуға қосқан үлесі үшін алғысын білдірді.

Мердігер компанияның мәліметінше, құрылыс жұмыстары кестеге сай және кідіріссіз жүргізілуде. Әкімшілік-тұрмыстық ғимараттың іргетасы құйылып, қабырғалар мен тіреу бағандары тұрғызылуда.

Футбол академиясының құрылысы Freedom Holding Corp. компаниясының қаржыландыруымен жүзеге асырылуда. Негізгі жұмыстарды 2027 жылы аяқтау жоспарланған. «Шахтёр» академиясы болашақ кәсіби спортшыларды даярлауға арналған база ғана емес, сондай-ақ Қарағанды облысында спорт инфрақұрылымының жаңа деңгейін қалыптастыратын бұқаралық футбол орталығы болмақ.