Теміртауда Қарағанды облысының Кубогы басталды

2026 жылғы додаға облыстың әр өңірінен 14 команда қатысуда: Теміртау, Абай, Саран, Бұқар жырау, Осакаровка, Шет және Қарағанды қалаларынан жиналған ұжымдар бақ сынайды. Жарыс жеңілген команда турнирден шығып қалатын плей-офф жүйесі бойынша өтеді. Қатысушылар санына байланысты жеребе өткізілді.  Қорытындысы бойынша  «Шахан» ФК мен «Бұқар жырау» командасы 1/8 финалда ойнамай, бірден ширек финалда өзара кездесетін болды.

Алғашқы ойын күні тартысты өтті: «Qarmet» командасы «ЖасАқ» ұжымын 11:0 есебімен ойсырата жеңсе, «Осакаровка» «Жауыртау» командасынан 2:4 есебімен ұтылды. «Ақбел» негізгі уақытта 1:1 есебімен тең түскен «Абай» ФК-ны пенальти сериясында жеңіп шықты.

Турнирдің барлық матчтары «Металлург» стадионында өтуде. Жартылай финал мен финалдық ойындар үш камерамен түсіріліп, кейін YouTube платформасында жарияланады. Кубок Қарағанды облыстық футбол ассоциациясының (QOFA) және Freedom компаниясының қолдауымен өтуде.

Ойын кестесі:

• 26 сәуір — 1/8 финалдың жалғасы

• 2–3 мамыр — ширек финал

• 6–7 мамыр — жартылай финал

• 10 мамыр — финал